將於下月二十四至二十六日於本港舉行的《福布斯》全球行政總裁論壇，終於公布最新落實會出席的嘉賓名單。據主辦單位同八方講，呢個論壇喺會展舉行，而阿董同阿松會一盡地主之誼，親自出席。
論壇嘅重量級演講嘉賓重包括美國前國防部長、《福布斯》主席的韋恩伯格（Weinberger）、中國證監副主席查史美倫、太古主席何禮泰、利豐主席馮國經……城中巨富四叔李兆基及郭炳江亦會畀面出席。
咁全球三百幾個CEO下月齊集香港開會，交通點搞呢？《福布斯》認真好橋，除咗搵到香港政府投資推廣署贊助九百幾萬，重搵到寶馬做「大會指定汽車」，贊助七十架頂級寶馬七系房車，連埋專用司機，畀班CEO穿梭香港。睇嚟寶馬今次埋單，連保險、司機人工等使費，每架車至少預五萬。
會議過後，七十架寶馬會大減價益港人。有心換車嘅讀者就要留意，九月二十六日後呢批原價八十一萬，減到六十八萬幾嘅靚車就會推出市面，音響、防盜全包，再加上有成功人士坐過，係咪好抵呢？
傳真︰2623-9278
電郵︰