美股連升3日，但港股噚日牛皮偏軟，恒指收9962，跌15點，成交僅43.68億元。ｉ師傅話，早前美資基金勁沽歐亞股市套現，滙返美國應付客戶贖回後，資金一直冇再從美國市場流走，反映芬佬繼續持有較高現金比重，短期港股成交唔使旨意有起色，芬佬唔繼續減持港股已經偷笑。不過，國泰（293）則要留意，噚日有啲退休基金入市吸納，相信有機會起飛。
噚日一口氣有10隻股份停牌，都算係一項創舉，如果唔清楚重以為細價股除牌機制已經生效，部份股份要停牌進入除牌程序。豐泰（260）、新銀集團（988）話配售新股；海爾中建（1169）將宣布重組；卓健亞洲（593）將出售EHEALTHCARE（835）；和記行（720）要重組股本；敦沛（812）、金科數碼（922）及萬順昌（1001）宣布股價敏感消息；兆晉國際（491）話控股權易手。
其中較值得注意係兆晉，據聞主要股東所押股權將被低價出售，令到此股被斬倉陰影一掃而空，股價或有反彈，不過大家咪開心住，因為買家所得股權唔會多，而且街貨分散，貨源歸邊需時。另外，海爾中建將落實增持國內兩間合營公司股權，海爾亦會進一步增持海爾中建持股量，成為大股東，早前傳出股東內訌一事亦會告一段落。
自從港交所（388）發出除牌機制諮詢文件後，引發仙股風波後，細價股真係靜如止水，唔少公司對前景仍然悲觀，希望趁住市場完全水乾之前有幾多抽幾多，否則呢個嚴冬都幾難過。
阿 虎