周三晚美股持續上升，杜指及納指升逾2%，但恒指噚日並無跟隨，似乎仍在消化周三近300點升幅，恒指最後收9962，跌15點。
杜指技術走勢偏好，7月24日低位7532延伸至今形成短期上升軌，目前升軌支持約在8100，不妨睇吓杜指後市是否維持一浪高於一浪走勢。杜指走勢基本上與近期公布嘅經濟數據唔脗合，究竟係走勢陷阱定係有利好因素未曝光，相信好快就會知。
恒指技術走勢較杜指差，雖然近期公司公布業績普遍較市場預期佳，但到目前為止重未有明顯轉勢訊號，大方向仍偏淡。
若要印證睇法有冇錯，分析幾隻主力大藍籌走勢可獲得啟示，恒生（011）係目前最強勢藍籌，重上50日線；其次係滙豐（005），升破10及20日線。目前較關鍵係中移動（941），近兩日重返10日線之上，下周三公布業績，如業績較預期理想及首度派息，將有利股價上升；但造淡理由則有中國電信上市或其他政策的改變可令人防不勝防，屬較難掌握的股份。地產股近期弱勢，若美國減息，對地產股始終利好，股價有望喘定。
按目前幾隻大藍籌嘅走勢，港股短期再急跌機會唔大，除非美股確認轉勢向下。短期好淡機會四六波，造淡並非太值博。
趙飛雲