經濟唔好，平嘢特別暢銷，樓都唔例外，但有發展商竟然講到明，話自己嘅樓賣得貴過人。呢個發展商原來係新世界中國，個盤係珠海新世界海濱花園。
蘭西日前去參觀現樓，見到大廈外面掛咗幅廣告，寫住「我貴因為我好」。蘭西問個究竟，佢哋話樓盤附近全部都係單幢樓，呎價121至130人民幣，佢哋個屋苑規模大，又有會所同泳池，加上攞埋優良工程獎，所以有條件賣貴啲。每呎167至177人民幣，比同區樓價貴咗36到38%，值唔值得就見仁見智。個盤近珠海機場，離市中心就似乎遠咗啲。
個盤今個禮拜六會有70伙在港發售，呎價260蚊，較內地再高些少，有折扣同送管理優惠。
新世界中國在內地擁有兩億呎樓面土地儲備，係港商中最多。新中起嘅樓盤，好多都係豪宅，最多人認識嘅應該係廣州二沙島嘅新世界棕櫚園，同新世界花園別墅，賣得都唔錯。
老牌家族冠華鏡廠許氏家族近期多搞作，原本作自用嘅沙田源順圍冠華鏡廠集團大廈，其中三樓萬九呎樓面，剛以全包月租七萬八蚊租出，呎租四個一，但扣除管理費同差餉，實際呎租只得兩個八，創同區工廈呎租新低。租客係汽車零件公司，因見租金平，先由沙田工業中心搬往上址。
冠華持有嘅南灣道南灣大廈頂樓複式單位，近四千六百呎，連千五呎天台，早前在市場放售及放租，叫價8000萬，月租23萬元。
冠華鏡廠在港持有唔少物業，有啲係用冠華命名，好似柴灣、觀塘同屯門嘅冠華鏡廠工業大廈，寫字樓就有尖沙嘴冠華中心。
新地馬灣珀麗灣現樓示範單位將開放，樓盤禁止車輛進入，但噚日就見地產代理嘅車出出入入。打探之下，先知係新地只准代理喺噚日運送物資入珀麗灣，運得幾多就幾多，第日就要另想辦法。
中原執行董事陳永傑話，公司租咗部五噸半貨車走咗4轉至運得晒啲物資，數量比前排促銷馬鞍山曉峯灣畔多兩倍。例如影印機有三部，傳真機有兩部，萬一壞咗一部都唔使煩。其他物資有碌卡機、枱、椅、蚊怕水、雨傘、風扇、乾糧同水等等，真係同走難差唔多。佢話預備咗十萬頂紙帽同紙扇派畀啲客。
美聯營業董事布少明話，今次準備50張枱、300張椅、500把雨遮、2000樽水（遲啲再有8000樽㖭）等等，用咗四個鐘先搞掂。布董透露，周五起會有1200至1300人駐場，為咗呢個盤，估計要用200幾萬。不過，呢個盤實有得賺，都唔計較得咁多。
至於利嘉閣地產亦用咗一個貨櫃裝物資，另外，利記又印咗三萬條有公司logo嘅毛巾送畀啲客。同時又買咗4000件T恤畀夥計。噚日一天嘅物資，計落都有成五六十噸。
利嘉閣撤出九龍灣麗晶花園兩三年後，噚日重整旗鼓，副主席羅林渭話，麗晶係今年最受歡迎的二手居屋，業主換樓能力強，加上舖租又平，每月營業額只要過二十萬就有錢賺。
佢計過條數，只要攞到三成成交量，加埋幫業主外區換樓帶嚟嘅收入，可以維皮。間舖亦係利記今年第十間新舖，分行數目達七十九間，跑馬地禮頓山分行下周開張。
另外，利記統計過，頭七個月，二手居屋成交有3180宗，總值30多億，比舊年少咗14%，樓價則跌咗約10%。
香港上海浦東房產交易會聽日揭幕，噚日先行造勢。上海浦東新區建設局局長閔師林，詳細向香港記者講述浦東過去十幾年開發成果。但老記醉翁之意不在酒，即刻扯住閔局長，問浦東係咪真係起迪士尼樂園，同埋新鴻基地產係咪攞咗浦東塊大型商業地皮。
局長佢真係答得妙，佢話香港起迪士尼就聽過好多嘞，但就冇聽過浦東要起迪士尼。
至於新地攞地，佢話好多公司有興趣，未簽約都唔敢講。
閔局長講，今次嚟港招標嘅六幅商住地皮，四幅喺陸家嘴，兩幅近浦東國際機場。
蘭西
電郵地址：