美股周二晚大幅反彈，原因係市場憧憬聯儲局會減息，另外思科公布業績較預期佳。港股噚日跟隨美股反彈，大升277點，收9977。
美股近期大上大落，好淡出擊都博到盡，但用到減息呢個理由其實好牽強，一來可減息嘅空間極之有限，二來減息對刺激經濟作用已不大，倒不如話美股對上3個交易日急跌後出現技術反彈。雖然睇圖杜指技術仍偏好，但過往經驗如股市走勢長時間大幅波動，通常都唔係好事。
趙飛雲倉內嘅恒指Put輪9205落車時間啱啱好，現時無股一身輕。短線部署係等恒指上試5月延伸至今嘅降軌阻力（現處10200水平），若一旦受壓回頭，可乘勢追入買Put輪；另一方面，如出現大裂口升破降軌嘅走勢，則有機會升穿埋大型橫行區底部重大阻力10400，上試11200水平。
目前最強勢嘅藍籌係恒生（011），噚日以裂口及大陽燭升破50日線（現處84.80元），收86.75元。恒生有隻Call輪9402，行使價85.25元，10月1日到期，溢價4.5%，槓桿率16倍。表面睇屬價內輪，而且數據不俗，不過計及除息2.10元後，就唔算抵玩，除非股價繼續飛升。今日講恒生，其實想提醒有正股嘅讀者，如見回頭跌穿50日線要先行沽貨，除非諗住長揸。
趙飛雲