呢邊廂，日本中型轎車以割價招徠，聽聞今個周末重會有代理加入戰團之際，另一邊廂嘅瑞典富豪汽車，卻忙於準備迎接2003年新款40車系嘅到臨。向來有車架穩紮富安全感嘅富豪車廠，今番替Facelifted新版嘅40，加入唔少新元素，務求令車迷有耳目一新嘅觀感。據知，今趟新車有全新車頭組合、鬼面罩、頭燈同泵把連整流器，加上四輪時款15吋跑車合金軨配搭，別具跑意之餘，當中率先打入嘅S402.0型號，雖然馬力輸出仍維持響136匹上落，但扭力卻較前提早見峯值，加上新裝嘅5前速自動波，相信引擎表現較前既慳油又好力，而趨時吸引嘅三幅式跑車軚環，以及遙控門鎖配搭亦係賣點所在，有興趣嘅朋友就要拭目以待喇！