美股杜指大漲230點，主要係因為憧憬減息，正如阿虎早前講過，美國現時身子虛弱，繼續減息可能出現虛不受補情況，而減息意味美國經濟前景轉壞，減息並非挽救經濟嘅良方。美股若只因為減息而反彈，可能引發更多基金趁機出貨，其實美股反彈主要係短線平淡倉活動，並非投資者看好後市表現。
港股噚日反彈，但始終受制10000大關。滙控（005）成交金額雖有9億元，但估計未平嘅淡倉仍相當大，好友重有冇勇氣繼續大力挾上，實令人懷疑。
國泰（293）業績簡直靚爆鏡，比市場預期中位數高出成倍有多，達到14.2億元，以咁好嘅盈利表現，股價只升10.28%，收11.80元，實在唔夠誇張，照計後市重有上升水位。不過，班機師見到國泰業績咁好，即時威脅可能要將工業行動升級，投資者對此唔多唔少都有啲顧忌。睇番近日藍籌公司公布業績，大部份表現唔差，滙控只係倒退少少，國泰重帶來驚喜，相信今日公布業績嘅太古A（019）都唔會例外。
香港出口貿易亦告轉好，照計經濟應該唔太差。不過，香港仍瀰漫住悲觀情緒，珀麗灣以居屋價錢發售，買家都重話要睇吓先，真係冇計。
ｉ師傅話，港府高官成日話北上有商機，所以啲錢同人才都掛住北上，而唔能夠北上嘅市民，好似覺得自己留喺香港等死，冇晒希望，有錢都要留住傍身。企業同人才個個爭住北上，睇吓到時有邊個交稅畀港府養住班問責高官。
股壇瀏覽器：超人傳買傳媒股
阿 虎