反彈終於出現，港股昨日承接美股升勢高開，午後國泰（293）公布中期業績遠勝預期，刺激恒指一度升逾300點，惟萬點關前受阻，恒指收報9977，升277點。
國泰前日急挫，昨日派張靚靚成績表，股價回升1成，非常合理。
兩件國泰Call輪喺正股帶動下，都飛咗上天，9140大升76%，威水輪榜排第2；9247升咗5成，威水輪榜名列第5。
9140現價13.4仙，溢價8.3%，槓桿率8.8倍，今年12月初到期；9247現價22.5仙，溢價4.9%，槓桿率5.2倍，明年2月尾先至到期。呢兩隻輪壽命頗長，因此溢價並唔貴。兩隻之中9140成交較多，如果睇好國泰後市，應該揀呢件。
經過昨日一升，恒指走勢冇咁惡劣，有機會營造雙底，但20日線（目前在10174）貼近中期下降軌，阻力甚強，不易一攻即破，候高做淡仍有贏面。
吼位做淡友，恒指Put輪可考慮9205同9287，新地Put輪則揀9432。不過，恒指RSI背馳日益明顯，大市隨時轉勢，玩Put輪只宜小注。
章 盛