民政局局長何志平上任後嘅每周一巡，噚日巡到去中西區同離島區議會。有區議員趁機向何局長投訴，指特首應該多啲落鄉郊接觸群眾，埋怨阿董呢啲「富家子弟」，五年來都冇落過去。何局長就識做好多，親口對區議員開期票，承諾以後三個月就會見佢哋一次。
八方數吓手指，十八區區議會，加埋其他相關嘅文化界、業界、宗教界、賭波團體等等，何局長淨係見人都用晒啲時間，重使做嘢？佢嘅新聞秘書解畫，話何局長上晝同同事開會工作，下晝先會出街見人。
釋智慧大師亦係離島區區議員，一見到何局長就急忙遞信，又同八方講咗一大輪寶蓮寺收地、收窄大嶼山行車線嘅問題，重好肉緊咁作勢揑住自己條頸，話唔好以為我哋自己好掂，其實係炸彈！八方一頭霧水再想問清楚啲，點知大師已經封嘴，頻說：「我唔應該講咁多。破咗戒㖭！」
傳真︰2623-9278
電郵︰