怕老婆究竟會唔會發達，我求大俠就唔清楚，但起碼會係工作嘅原動力。啱啱加盟英甲球會狼隊嘅恩斯，就因為佢老婆唔畀佢退休，所以要繼續踢波。
十月滿三十五歲嘅恩斯今夏同米杜士堡約滿後，原來諗住轉去讀教練課程；但係，佢老婆嘉兒就認為佢重後生，唔畀佢退休住，重要佢嗱嗱臨搵班落。咁啱狼隊求才若渴，結果重一拍即合，簽咗份周薪一萬鎊（約十二萬港元）嘅一年合約，重同曼聯棄將艾雲再續隊友緣。
講真吖，以恩斯嘅身家，就算冇嘢做都唔憂會冇飯開，但年紀比佢大嘅基昂、白蘭斯同舒米高重踢緊，所以佢老婆唔畀佢退休住，其實真係為佢好。
英甲嘅水準同英超肯定冇得揮，但多咗恩斯呢位前英格蘭國腳，連同麥臣、賀蘭特同拉雲拿利等猛將，其實都好有可觀性。新一屆英甲會喺今個禮拜六開波，球迷記得密切留意嘞！
隨巴塞隆拿去英格蘭同紐卡素踢友賽嘅古華特，日前自爆話好有興趣去英超踢波，重話想效力紐卡素㖭。之但係，明眼人都知佢費事得失啲英國記者先至會咁講，事關佢喺巴塞隆拿好食好住，又有同鄉教練雲高爾照住，又點會去到冬天凍到你儍嘅紐卡素效力呀！
李華度咪話今季好想同朗拿度較量嘅，最近兩個即刻鬥做體育傳媒新聞主角。好明顯各傳媒集中報道朗拿度鬧轉會消息，無人理李華度；換轉平時，李華度去AC米蘭過體測兼話着十一號球衣，都可能係頭條啦陰功。
網球明星曉域治噚日因為拒絕出席賽前記者會，俾辛辛那提賽會罰佢二萬美金或者今次比賽所得獎金嘅一半（選多嗰份），呢位向來臭脾氣嘅澳洲仔初時激到想唔打，但最後都有出場，重畀咗兩隻光蛋對手食㖭；照我求大俠睇，曉域治今次梗係化憤怒為力量啦！