賓架B夫婦應邀出席楊紫瓊套電影首映禮，之前有一個酒會，衣香鬢影，不在話下。楊紫瓊是晚豔光四射，狀態極勇，梗係啦，自己掛正頭牌，電影為佢度身訂做，楊小姐唔扮到鬼火咁靚嘅話，等幾時呀。
賓架B對楊小姐有興趣睇多幾眼，B太就對楊小姐當晚着嗰件衫特別有興趣。睇到眼甘甘。楊小姐呢套晚裝係獨一無二嘅，由設計師特別為佢度身設計、訂做，用名貴歐洲布料，白色絲質長裙，閃閃生光（因鑲咗水晶），閃到B太眼都昏埋。
B太羨慕之餘，睇吓自己，問老公：「我都可以着嗰套衫啫！」賓架B好醒目，即刻話：「着得，着得，你有資格之至。」B太跟住話：「去邊度做番套呀？」賓架B為之苦笑，並唔係笑老婆唔夠fit，而係苦自己嘅荷包，楊紫瓊為首映禮而揀嘅靚衫，實唔慌平得去邊也。
次日上午賓架B打電話搵左丁山：「喂！你咁八卦，幫我仄吓楊紫瓊在首映禮着嗰套衫，價錢、牌子、設計師，等我評估吓，太貴我就會好肉痛。」幸好左丁山亦識得一啲娛樂八卦記者，搵料唔算太難，下午就覆番賓架B：「喂，楊紫瓊套晚裝由源（BlancdeChine）贊助，由『源』設計、縫製，約值十萬港元。佢響套戲入面着好多件衫，都係由『源』贊助嘅。你有興趣就帶太太上去畢打街畢打行二樓度身，話唔定會撞到朱玲玲、劉德華、成龍、董立茂等名人㖭。」十萬銀一套晚裝？賓架B聽完暈得一陣陣。