無綫《2002年度香港小姐競選》決賽會喺下周日（十一日）舉行，大會前晚安排十二個準港姐去咗沙田做宣傳。
大熱20號嘉碧儀已經攞咗「最上鏡小姐」、「超越自然肌膚獎」、「纖體美態獎」同「2002年度最受佛山南海巿民歡迎獎」，佢前晚又攞埋「最受佳麗歡迎獎」，屈指一算，嘉碧儀𠵱家已經有五獎喺手。問到嘉碧儀係咪好有信心攞埋港姐冠軍，佢話：「我攞咗啲獎，信心都大咗。」
嘉碧儀得到嘅票數，喺二百張票數中佔過半數，而港姐大熱門之一嘅19號左慧琪啱啱輸咗畀嘉碧儀排第二，左慧琪話：「我唔覺唔抵，因為我同嘉碧儀都好好朋友，邊個攞獎都一樣咁開心。」
此外，8號葉凱茵抽出一個投佢票嘅女士上台，個女士話：「我順手投你票啫！」葉凱茵聽到之後好尷尬，佢話：「佢咁講我都好hurt㗎。」
麥浚龍（Juno）做新城《聯FAN所》嘅嘉賓，佢噚日一早就由兩個DJ陪住去買定早餐，之後重用專車載佢嘅fansInez返學校一齊睇會考成績。Inez亦都不負所望，佢攞到3A、2B、1C嘅優異成績，而Juno知道自己個fans有咁好成績亦都好開心。
寇鴻萍同名模周汶錡前晚一齊去中環蘭桂坊KeeClub消遣。
寇鴻萍前晚喺上海返嚟，佢喺上海聽過陳寶蓮自殺嘅新聞，佢話：「我都識陳寶蓮，重試過一齊去台灣玩。我唔知佢喺邊度舉殯，冇去拜佢。我覺得佢留低個BB好慘，好可憐。」
楊千嬅噚日喺尖沙嘴為佢嘅演唱會拍電影短片《我愛豬腸粉》，《我》片會安排喺楊千嬅嘅演唱會度播，李力持做監製，而千嬅就做導演，佢重叫咗雷頌德同古天樂友情客串。
千嬅話今次做導演係經理人黃柏高嘅意思，而電影內容就會同千嬅嘅歌有關。再問千嬅今次情商咁多朋友幫手，咪欠咗好多人情債，佢話：「我平時好少爭人嘅，信譽都幾好，搵古仔係因為同佢合作過，有默契。」
盧巧音啱啱喺溫哥華做完個校園騷，最近盧巧音心情又開朗番，佢話唔會因為感情令自己唔開心。查實佢咁開心係咪同梅艷芳嘅徒弟彭敬慈拍拖有關？盧巧音話唔明點解會有咁嘅傳聞，當日係一班人去玩，絕對唔係單獨約會，𠵱家都未有心情拍拖。
馬浚偉噚日喺新城電台做訪問，佢話養咗九年嘅松鼠狗突然死咗，佢都好心痛。馬仔話：「隻狗好有靈性，平時隻狗多數瞓喺家姊或我嘅房門口，但佢臨死嗰朝竟然瞓咗喺廁所門口，當時我都覺得奇，後來我放工返嚟唔見佢，家姊話隻狗死咗，已經攞咗去火葬，我哋將會養過隻金毛尋回犬。」
由香港電台、有線電視、亞洲電視同無綫電視四間電子傳媒進行嘅「2002電視節目欣賞指數調查」，第二階段結果噚日公布，暫時領先嘅係亞視播放嘅《尋找他鄉的故事V》，而無綫劇集、由郭晉安同郭藹明主演嘅《情事緝私檔案》就佔第十八位。
章小蕙好多時把口唔收，搞到得罪人多，稱呼人少。馮仁昭最近就聽聞佢開口得罪咗劉嘉玲，話說有日佢哋兩個喺中環啲名店撞到，章小蕙竟然喺大庭廣眾問劉嘉玲，點解佢真人比佢喺雜誌影嗰啲相肥咁多，搞到劉嘉玲幾咁尷尬，惟有同佢打個招呼就急急腳走人。