港股噚日雖然跟隨美股大反彈，部份股仔亦跟住炒上，但好多早前經過除牌風波受重創嘅股仔，就始終冇法收復失地，重一浪低於一浪，小初睇見都覺得牙煙，實在唔敢亂掂。
兆晉（491）自從在7月26日細價股風暴中勁跌90%後，股價好似只係反彈過1日咁大把，小初當日已提醒過讀者勿沾手。
之後隻股走勢真係冇乜起色，噚日更一度插至最低1.4仙，收1.9仙，大跌17.4%，成交股數有成5億股，話大股東再次被斬倉，睇怕都會有人信。
經紀黃報料，幕後人士仍在力挽狂瀾，周圍撲水保江山，但因為家陣市況麻麻，所以尚未有眉目。
查實家陣市場有水嘅人唔多，數嚟數去都係得幾個，度唔度到水，應該好快就知道，總之有貨嘅讀者真係要小心。
慕容小初