梁錦松伏明霞在美國結婚，全港傳媒都唔知，當然亦冇人影到相；不過，《星島》前晚終於在壽山村道財爺官邸門口影到一對新人的合照，梁太重笑得好甜，大有「我係官太，邊個話我要住桃色公寓？」之氣派。
八方昨日再去壽臣山，想睇睇有冇機會一睹國寶的風采，可惜等咗三個鐘連影都見唔到；門口個「實Q」哥哥話：「梁太今朝八點就出咗去啦。」咁佢嚟咗幾多日呀？「唔知喎。」咁佢有冇去買餸煮飯呢？「唔覺喎，我哋有廚師，司長夫人唔使煮飯啩。」
等到腳軟，最後惟有打電話畀阿松個秘書，點知佢話：「老闆娘返咗北京，下次再影啦！」都唔知真定假。
講起阿松，蜜月期間，愛人在側，本來好Happy，可惜無端端爆單細價股除牌風波，累到阿松同馬時亨成為仙股罪人；本來單嘢唔太關佢哋事，但公眾看法有時好難捉摸，好似《明報》個即時新聞網，做咗一個網上民意調查，問邊個要為此一風波負最大責任；網主畀咗六個選擇大家揀，依次係鄺其志、沈聯濤、馬時亨、梁錦松、李業廣及沒有人要負責，取向都好明顯，點知投票結果竟然係阿松一馬當先！
傳真︰2623-9278
電郵︰