上個周五連續三日，本田代理以震撼價推售Accord車系，以唔使15萬嘅價錢，就可以擁有一部全新Accord2.3標準版，可算係創出Accord有史以來嘅新低價；及後，代理加推配額並將售價調高，惟落訂人數仍有增無減，聽聞𠵱家埋單計落，全線Accord共賣出約三百部，難怪全個車行都為之而側目啦！有口痕友問亞Mark，係咪代理想清存貨，以迎接快將推出嘅新Accord車系呢？亞Mark亦唔排除有呢個可能，但若代理繼續收Order的話，相信新Accord登陸香港嘅日期，勢必推遲至10月底都唔定；而據亞Mark所知，代理原意希望引入新一代日本版Accord，事關美國版Accord前車可鑑，唔係咁為港人所接受，然而廠方至今仍未有正式回覆，睇怕成數唔高，咁不如亞Mark先將美國Look嘅新Accord，預先畀車迷過吓目，睇吓你哋寧願買舊款，定係儲錢買新車喇！