愛華頓今季最矚目嘅收購，對我哋中國人嚟講，梗係李鐵同埋李瑋峰；不過，講到好波，就要數佢哋由保地花高簽番嚟嘅巴西球員洛迪高。
呢位被選為巴西最性感嘅球員，唔單止睇得，重可翼可鋒，加盟愛華頓以嚟好評如潮，最近接受訪問重好大口氣咁話自己係「新李華度」。佢話：「我打法同李華度好似，但勝在比佢後生，佢三十歲喇，我得二十六，絕對係『新李華度』！」
洛迪高係咪真係咁勁，大家要拭目以待，不過我求大俠就希望佢似李華度咁好波就好嘞，千祈唔好似李華度咁扮嘢，同埋最後俾球會解約。
講開英超嘅巴西兵，阿仙奴嘅伊度就好搞嘢，喺同鄉國腳G施華加盟後，佢立即認咗G施華做大佬，重話希望佢同國家隊教練史高拉利講番幾句好話，等自己可以入選國家隊。不過，我求大俠就想提醒伊度，入選國家隊係要靠實力唔係靠人事㗎！
球員轉會喺現今球壇其實好平常，不過列斯球迷就似乎冇品咗啲，因為佢哋本來選咗英格蘭後衞李奧費迪南，做球隊上屆嘅最佳球員；但當李奧轉會曼聯之後，佢哋為咗唔畀李奧攞獎，竟然連頒獎禮都取消埋。列斯球迷會主席重話遲啲會進行補選，咁都得？
早陣阿加斯因為今年第二次臨陣退出比賽，俾ATP加倍罰款唔見咗大約六十二萬港幣；呢位三十二歲老將噚日大呼ATP嘅規例無情，完全唔考慮佢嘅年紀已今非昔比，實在冇可能接連比賽。
但我求大俠認為，既然知道自己體能支持唔住，又何必應承參加比賽啫，而且重要係開賽不足半日話受傷退出，咁要賽會臨急臨忙點搵替補喎，呢次阿加斯真係爭唔落。