在曼谷旅遊時，到處都看到碧咸的廣告牌，時裝又見到佢賣廣告，油站又見到佢賣廣告，若選舉誰是世界上最出名的十大名單，碧咸應該定過抬油，順利入選。
到深圳時，一出火車站便兜口兜面看見一幅大廣告牌，主角是一位香港人都熟識但噏唔出名的女孩子。大家應該都看過一個甚麼印度沐浴露的廣告，因為此廣告好似唔使錢一般的密集播出，此廣告除了有一首奇怪的主題歌，不斷重複着「陳、陳、診」之外，女主角更是靚到揼一聲。唔知道亦睇唔出該女主角是否真的是印裔佳麗，但眼大大、嘴細細、輪廓深刻、腰肢款擺，少女眼神奪魄勾魂，真係可以講得上係印度西施或者係印度李嘉欣。
一向都覺得印裔女孩子非常漂亮，這種感覺某程度上來自神秘感。在加拿大唸書時，曾一度想打進印裔圈子，但印裔家庭比較傳統，不太喜歡自家女孩子與外人做朋友，尤其是親密朋友。印度電影產量雖多，但大部份都係圍住棵樹唱吓歌、跳吓舞，跳足九十分鐘然後散場。較有娛樂性嗰一批嘅主角統統係男人，性感嘅亦係男人，不太吃得消。
好似有齣叫做《我愛碧咸》的電影快要上映，故事講述一名生長在英國的印裔少女因迷上了碧咸而參加足球隊。我對碧咸就越嚟越麻麻哋，但戲中有不少印裔青春少艾，單憑呢一點，如無意外我都會捧場。