美股周一由頭跌到尾，杜指及納指均大跌逾3%。美股跌勢急，港股繼續尋底，恒指噚日低見9632，再創今年新低，尾市期指反彈，帶動恒指跌幅略為收窄，險守9700收市。
前日趙飛雲提過，如果大藍籌地產及電訊股唔止跌，單靠滙豐（005）係好難支撐港股唔跌。恒指再創今年新低，睇勢會向去年911事件低位8894反覆滑落。不過由於杜指3日已跌咗702點，而恒指過去4個交易日亦跌566點，因此唔排除短期會先出現反彈。
趙飛雲博到美股周一晚繼續大跌，恒指Put輪9205噚日進一步造好，但期指尾市跌至9560低位後反彈甚急，為防今日港股會有反彈，侵蝕9205嘅利潤，所以先沽出套現，寧願今日睇定再出擊。炒恒指輪其實好似炒期指，單日可以出現好大變化，極講求掌握出入時機，既然係一擊即中，則無論捉到大魚定細魚，總之要捉實佢，唔好畀佢再跌番落海。
港股短期淡勢已成，趁每次反彈造淡係大方向，直至調整足夠轉勢為止。其實每一次大跌市都提供低吸良機，係中長線入市嘅時刻，雖然趙飛雲係短線炒家，但卻相信低吸優質股長線持有，至係贏大錢嘅投資方法。
趙飛雲