通天T去「今日世界」尋歡，打聽到啲經理要「卒數」。「卒數」呢個本地詞語，唔知從幾時開始，（石琪兄如有空，請查證），現在就好流行，即係我哋以前話「交數」咁解，亦即營銷人員、行街sales話要交quota。
賓架陳對「卒數」技術，知之甚詳。佢做銀行見習主任之時，個個星期五早上開「早禱會」，鬼佬經理一早叫人畫晒chart（圖表），掛喺會議室示眾，傾完啲營運事務議程（半個鐘頭講完），經理就逐張圖表批評：「阿陳，你上星期call客唔夠數，存款目標未達，貸款數碼少咗，你係唔係偷懶想唔撈？」賓架陳個個星期都受壓力，搏晒命去行街call客，有時做到晚上七點幾鬆人，俾鬼佬經理見到，大喝一聲：「咁快走做乜，你喺銀行做兼職㗎！」
今時今日，輪到賓架陳向下屬卒數，佢一位夥計去到葵芳見客，走入新都會美心酒樓食飯，去廁所之時，經過茶房，近門口見到一張「月餅銷售龍虎榜」，又係「卒數」方法之一，啲侍應或喼頓各自孭月餅配額，每個星期賣得幾多，就畫在圖上，喼頓見到某人推銷月餅數額條紅線好長，自己條線好短，咪話唔心急兼心實。上星期左丁山應約到力寶中心「力寶軒」食潮州菜，食到咁上下，喼頓就行埋嚟推銷月餅，睇嚟又係要交數啦。大佬，農曆六月未完，就買八月十五月餅？早唔早啲呀？但回心一諗，自己一到月尾就要找數、出糧、交租，咪一樣自己「卒」自己數！