好多後生仔都鍾意玩ICQ，咁羅范椒芬同王䓪鳴，一個係教統局常任秘書長，一個係青協總幹事，夠唔夠貼近年輕人，知唔知ICQ為何物呢？噚日青協嘅100小時不停站熱線及ICQ輔導正式啟動，羅太同王䓪鳴呢兩位主禮嘉賓，一見到輔導員用ICQ就嘩嘩聲，連聲稱讚佢哋打中文認真快。原來兩個都玩過吓ICQ，算佢哋合格啦！不過只限於同喺外國讀書嘅仔女溝通，所以只識打英文，唔使講當然係啲細路教佢哋玩㗎啦。
Fanny羅跟住同成班應屆會考生真情對話，原本想了解吓佢哋心情緊唔緊張，點知班後生仔女見到高官，大吐苦水，指教育制度僵化，完全冇空間畀佢哋發揮創意。Fanny雖然被打個措手不及，態度仍然好誠懇，笑說同學講正教改要害，得閒要同後生仔傾多啲。佢又話自己當年放榜前都擔心到失眠，勉勵學生日後最好做老師，將自己嘅心得傳授後輩。
（圖）羅范椒芬與王䓪鳴讚輔導員打中文快。
傳真︰2623-9278
電郵︰