時富投資（1049）同埋旗下時富金融（8122）及實惠集團（996），近日股價表現非常差，3隻股份在成交唔多嘅情況下創出近期新低。
經紀陳話，呢系公司明日公布中期業績，睇怕股價已經反映一切。時富投資主業係做股票經紀，但經濟環境咁差，大市成交一路跌，你話生意點會好。
雖然佢哋上年已經實施控制成本政策，孖展又做細咗好多，但睇怕最大好處，都只係細價股除牌風波中冇受太大損失，但唔等於會有錢賺。
實惠做開零售，業績自然受經濟環境影響。不過，舊年重有錢賺，公司又積極拓展，但股價咁跌法，可能有舊股東蟹貨未沽清，要錢唔要貨。
講起時富投資，佢有份做保薦人嘅盈新遊樂（703），話就話在下周掛牌，但缸湖傳聞好似重未圍晒飛，有關人等重通山四處跑。
慕容小初