如果攞住$198去希臘餐廳，可以叫一個頭盤加一個主菜？又或是主菜加個甜品？全部都錯，答案係無限量任食。在中環伊利近街就有一間希臘餐廳，以$198任點任食即製希臘菜作招徠，當中包括法國、中東、地中海菜，頭盤到甜品每碟熱辣奉上，加上不限時間，在無時限壓力之下，你就可以盡情食到回本，捧腹而回，但開餐之前記得先打電話訂位，否則白走一趟就唔好啦！
記者：黃婉冰 攝影：陳偉強
ImageGirl：王穎
生蠔可以生食之外，重有好多食法，用來煮湯一樣可以飲到其啖啖鮮甜。這個蠔湯正確來說應是雜菌生蠔湯，事關湯底除了用蠔、雜菜、白酒、少許薑煲成蠔湯之外，大廚會另外用三、四種鮮野菌再煲一個野菌忌廉湯，將煲過湯的蠔肉打爛，再連同兩個湯底一煲，就成了這個由頭「蠔」到尾的湯。
新鮮蔬菜是希臘菜的必備材料，有時候不同菜款，都可配搭出一道清新特別的菜式。這道矮瓜卷只用上矮瓜及新鮮野菌，以薄片矮瓜卷着鮮野菌，撒上芝士烘至表面的芝士溶化同帶有微燶，啖啖菜，是頭盤中另一特色之選。
法式鮮蝦包
三角形的並非咖喱角，是土耳其頭盤之一，餡料是用調味料炒過的菠菜同羊奶芝士，用Filo紙包到同咖喱角一樣再焗香，勝在不油不膩。正方形的是包有用香料炒過的鮮蝦肉，青、紅波椒的法式蝦包，兩種味各有不同，但同樣要配合黑醋汁先傳神，有時候頭盤來點香口的，同樣可以令胃口打醒十二分精神！
這裏有羊扒，亦有這種具地道特色的串燒，選用嫩滑羊髀起肉，加入最傳統的希臘香草，花椒粉、紅粉、小茴粉、蒜茸等這些香而不辣的調味料醃至入味，用巨型鐵籤串起來燒，每碟都會跟同樣重量級的雜菜以平衡羊肉帶來的油膩感。至於汁醬，是用鮮番茄肉加入青、紅椒、香草調成的濃縮沙沙汁，酸味同樣可以減輕膩口感覺。
燒鴨燒鴨，鴨肉莫非真的要燒過先香口？大廚表示用炭燒方法烹調肉類，可以鎖住肉汁之餘，又可以將多餘脂肪燒走，只要用丁香、紅椒、花椒粉、蒜頭醃鴨肉，燒出來的鴨肉就又嫩又唔肥。話明香橙鴨，汁醬當然以橙為主，汁底是燒肉汁，以香橙君度酒，經炒過去除苦澀味的橙皮三合一做成鹹的橙汁，淋少少，吊吊味，同法式香橙鴨有點相像。
法國鵪鶉體形健碩多肉，所以被大廚睇中用來做其中一款主菜，釀在鵪鶉內的中東米，用蒜茸、小茴、青、紅波椒、Thyme香草等炒至乾爽軟身，將成隻鵪鶉填滿後以炭燒方法炮製，用回Thyme香草汁，鵪鶉經過一輪消脂後，變得一身古銅色，肥油減去不少。
大廚Marco：「中東飯乾身爽口，鵪鶉肉就嫩滑，一硬一軟，口感較好，味道唔錯。」
啤酒$38/支
自助餐唔包飲品，但不妨試一試這裏的的希臘紅、白餐酒或啤酒，負責人表示希臘啤酒酒味較重，另有一種用餐酒加橙汁溝製而成的西班牙特飲，同樣值得一試。
店名：ATHENA
電話：25218963
地址：中環半山蘇豪伊利近街37號地下
座位：28個
營業時間：中午12時至下午3時，晚上6時至午夜12時。
供應時間：星期一至日晚上6時至午夜12時
收費：每位$198
付款方法：現金及信用卡（Visa,Master,Diners）
備註：必須電話預訂