小初上周講過康師傳（322）業績會好掂，果然佢真係不負所望，盈利上升1.5倍，但點知班芬佬好消息當正壞消息炒，明明晏晝重見到大摩掃緊貨，但收市竟然倒跌12%，收2.025元。
小初走去問經紀陳，佢歎氣話冇計，芬佬根本唔睇好個市，唔好講藍籌，就算呢類優質工商業股份都要沽。不過有好幾隻細價股又升得好開心，咁又點解釋呢？
經紀陳話，其中金科數碼（922）股權易手之後，無論成交同埋股價都冇咩異動，但自從上個星期佢聽到有個大戶手頭有多少金科股份，去過幾間財務機構傾計之後，股價就開始異動。噚日升14.1%，收21仙，成交股數有成1226萬股，當中唔知有冇關連。
另外，早排小初講明神州醫療（8186）完成任務唔會再炒住，噚日急跌30%，收33仙，希望小初嘅預告可以幫到大家。
慕容小初