新科技，到處都是新科技，每天都有新科技。不要以為一定要開電腦、上網、插插蘇才有新科技，其實新科技已暗中每分每秒陪伴你。
衣服料子是新科技，水份粒子有出冇入；鞋底是新科技，着咗之後可以彈吓彈吓唔傷膝；頭髮用品是新科技，搽咗唔知咩「乳」就可以好油潤但係唔持久，搽咗唔知咩「泥」就可以令髮型持久但又冇咁潤，新出嗰隻「啫喱」則又持久又油潤但比較臭。各行各業、各個界別、各個範疇，全部一齊研究新科技，每種新產品都有新賣點，但與此同時又有新缺點，於是下一個產品補救了舊缺點，帶來了新優點，但又產生了新缺點。消費者們追着新科技追得團團轉，恐怕這是一場一生一世的追逐戰。
近來雜誌上的廣告大都是甚麼豐胸、纖體、美白的，外國回來的朋友看完雜誌後說：「咦？乜香港𠵱家啲女仔個個都好肥、波細兼黑麻麻咩？唔覺呀。」這類型的廣告也一律標榜新科技，最近看到的兩種簡直令人歎為觀止。一種是在臨睡前喝上一瓶不知甚麼，翌日一覺醒來隨即上磅，跟住就會歡喜若狂地大跳大叫：「瘦咗呀，瘦咗呀，瘦咗呀……」世間上有比這更便宜的事嗎？若果有的話，那真比執到金更值得高興；另一種是去皮膚污迹擦紙膠，只需在皮膚上擦、擦、擦，不知是真的擦掉了死皮還是該產品的剩餘渣滓，反正在電視上真的看見擦到污糟嘢出嚟，重真係白咗㖭，犀飛利！
希望快點推出掌紋擦紙膠，讓我把生命線改得又粗又壯、事業線又直又長，最緊要係加多十條八條姻緣線，等我一覺醒來後大跳大叫：「有女呀，有女呀！」