高官個個要申報利益，特首亦不例外，原本規定超過二千蚊嘅禮物先至要報，但阿董可能怕俾人雞蛋裏面挑骨頭，連相架花瓶紀念章都通通申報。過去一年來特首收到近三百份禮物，其中不乏騎呢古怪東西。
好似去年中秋節，阿董收到三盒月餅兩箱韓國梨，農曆新年就收到三盒年糕、賀年油器、冷衫、冷頸巾、水仙頭同蘭花等等……。咁多過時過節嘅傳統應節禮品，真係充份顯示出阿董喺公眾心目中嘅家長形象。
重有，有人送上八段錦光碟同鴛鴦雙劍，唔通係暗示特首淨係識耍太極？另外，阿董都幾有口福，因為耐唔中就有人送來食物水果，好似芒果、荔枝、海參、花旗參、茶葉、蛋糕、火腿、生果籃……。嘩，董生一個人點食得晒？睇怕都要董太同啲孫幫吓口先得。
且慢，原來阿董有得睇冇得食，根據特首辦發言人解釋，呢啲禮物分成兩類：一種係有商業價值嘅，交由庫務署處理，如果賣得出，收入撥歸慈善用途；另一種係阿董想保留嘅，就要由庫務署估價，再由特首自己掏腰包買返屋企，的錢同樣係捐做善事。
大家不妨估吓阿董對啲乜嘢禮物情有獨鍾，會畀錢買返屋企？
傳真︰2623-9278
電郵︰