滙控（005）業績表現不俗，恒生（011）派息亦甚吸引，每股派2.10元，1個月後收息，好過存款多多聲。不過歐洲股市持續下挫，拖累到滙控亦腳仔軟。
滙控噚日顯示嘅訊息，唔單止業績好，重對拉美情況可以穩定下來頗有信心，並指全球經濟有復甦迹象。雖然現時唔少大行開始睇淡美國以致全球經濟，但滙控係國際性銀行，而且係一隻準確嘅春江鴨，管理層言論一向保守，影響舉足輕重，其他大行都要參考，所以唔可以當佢冇料到。
神州醫療（8186）噚日一開市就勁挫，據聞話係先前認購咗3500萬股舊股班投資者，見勢色唔對路，開始出貨止蝕。呢批股份係大股東以先舊後新方式批出嘅舊股，每股作價0.57元，交易於上周一已經完成，當時股價已跌至0.50元，上周五更進一步跌至0.475元，加上重傳出有主要股東想減持，唔驚就奇。此股噚日收0.33元，跌30.5%，成交達1227萬元。
康師傅（322）噚日股價勁挫12%，收報2.025元，芬佬果然趁好消息出貨，真係沽慢啲都冇鼻哥。此股由0.50元水平起步，炒上2.475元高位，目的都係等業績轉好後散貨，噚日成交只得1667萬元，芬佬手上應該重有大把貨，而接貨嘅買盤唔多，相信未跌完。
其實要獲利回吐又何止康師傅捧場客，重有中保國際（966）、新奧燃氣（2688）及大成生化（809），佢哋分別急挫12.4%、15.3%及20%，成交全部過千萬元。Cookie話，有基金對中國經濟前景有懷疑，所以要減磅鎖定利潤。
阿 虎