樓市又再熱鬧，發展商高層忙個不亦樂乎。好似長實咁，密鑼緊鼓度橋迎戰離島盤，噚日喺紅磡都會海逸酒店搞記者會，邀請信話會講泓景臺二期銷售安排，但原來主題喺兒童會所，搞到蘭西好鬼「冇癮」。
唔單止咁，記者會足足遲咗成粒鐘先開始，成班記者等到頸都長。負責人話係交通延誤所致，蘭西估，梗喺趙生近排公務繁忙，先搞到遲大到。不過，對於馬灣珀麗灣低價開售，趙國雄好有信心咁話：「都知佢哋做邊瓣，點會截唔到胡？」蘭西心諗，今個禮拜就揭盅。
今次長實主攻一批家庭客，所以耗資近億元，炮製一個三層高嘅兒童會所，包括五個主題區，有動有靜。發展商聯同提供益智兼多元化嘅兒童用品公司合作，提供各項設施。例如蘋果電腦、辰衝圖書、Lego代理建偉集團等。𠵱家嘅小朋友真幸福。記者會到尾聲，重搵到班小朋友嚟演奏小提琴同鋼琴，頓時感到，未來主人翁實在值得用心栽培。
香港興業噚日朝早十點三，喺新加坡開記者會，公布愉景灣海澄湖畔二段嘅價錢，意向價每方呎3500蚊，比之前一期嘅造價3800至3900蚊低，但就平唔過後來公布開售價嘅新地馬灣珀麗灣，呎價2250蚊。香港興業有冇後悔咁早就公布意向價呢？不過，佢哋可以先「唱高開低」，結果嚟個震撼價應市咪得囉！
另外，海澄湖畔二段𠵱家重搞咗個「買家推薦獎賞」計劃，凡愉景灣住戶成功推薦買家向發展商直接認購單位，可獲得一萬蚊現金大利是。
同時，發展商又拍咗輯「家在愉景灣」電視特輯，主題分別係「赤子童心」、「悠悠二人行」、「翱翔樂家園」同「執子之手」，帶出愉景灣為現代家庭締造理想度假生活模式。
據講發展商特別訪問咗成百五個愉景灣家庭，先至揀到呢四個具代表性嘅家庭。
呢輯電視廣告好快會「出街」，最想睇嘅，唔知係咪啲愉景灣住戶呢？
7月份樓市唔好景，又冇乜新盤，好多人都以為地產代理要食老本，點知蘭西上中原地產個網頁睇吓，估唔到生意比六月重好些少㖭。施老闆飲得杯落！
蘭西細心睇吓，中記只係住宅部條數跌咗3%，但都有成四千四百幾萬元。
工商舖部就大發神威，做到1002萬佣，係呢個部門98年以嚟嘅新高，原來係做到好多大手租務成交。至於中國部就保持平穩，有2028萬數，比6月微升兩個百分點。
今個月啲大盤開始出台，住宅部應該會大豐收，中記佣金有機會再過億。
新地馬灣珀麗灣開售，千呼萬喚始出來，每呎2250蚊，噚日開記者會，地點繼續係葵芳新都會廣場六樓。公布售價之後，大家行上七樓，以為睇吓啲代理同客戶嘅入票情況，行吓行吓，突然間入咗家具舖，原來係新地特設嘅家具套餐區。
珀麗灣推出「超凡品味」裝修家具優惠套餐，一房單位4.49萬，三房單位就要9.98萬。
「超凡品味」套餐共有四款組合，就係「自我新時代」、「潮流品味」、「舒適天地」同「典雅時尚」。每款單位有超過二十四種乳膠漆、十種木料飾面、窗簾布、梳化布同餐椅布料配搭，花多眼亂。
但蘭西比較關心多個大盤對撼嘅戰況，新地雷霆就話根本冇驚過「佢哋」（長實），只係做自己嘢，重話「佢哋」減價，自己就加價喎！因為珀麗灣係最獨特。雷生重指「人哋」附近大把樓盤；自己冇理截唔截擊㗎。
噚日新地郭三少（炳聯）親自到新都會視察軍情，但就唔肯同記者講兩句，蘭西想收料都唔得。
珀麗灣同長沙灣泓景臺未開賣，但啲高層已開始鬥嘴，睇嚟重有排鬥。
蘭西
電郵地址：