好久不見通天T，此日佢在茶室出現，報道近況。原來佢覺得香港冇得做，北上神州，去到極北嘅東北三省黑龍江一帶，唔怪得佢好少在香港露面啦。通天T同一班大陸客落嚟開心，去搵「新杜老誌」，發覺已經執咗，於是去港島唯一嘅日式夜總會「今日世界」，晚上十一點，冇晒房，等咗一輪幸好有人埋單，先至有位坐，大陸客話：「香港真係旺咯。」
係唔係咁好景呀，通天T都𢱑頭，後來佢打探到，「今日世界」班管理層，每兩個禮拜開「集思會，腦震盪」，唔使去到黃金海岸咁作狀，只係閂埋門就開「鋤生意大會」，高層猛咁「卒數」，要啲靚媽咪、靚女落力做生意，掹住啲熟客。呢個年頭，萬事以sales為主，交唔夠「配額」，唔該鬆人。呢間「今日世界」滿肚密圈，購入「新杜老誌」原址三層，地下至二樓，將「今日世界」搬過去，九月啟業，叫做「今日杜老誌」喎。
啲媽咪捉住通天T，要佢九月帶多啲大陸豪客嚟捧場，通天T就問賓架陳：「喂，叫多啲客落去吖，幾好玩㗎！」賓架陳耍手擰頭：「我從來都唔去，咁多年來，逢有廠家、貿易商叫我去夜總會，我都推晒。有事要借錢，咪食午飯飲茶傾掂佢囉，使乜夜晚搵靚女陪住傾，又話拉攏感情啫。以我多年經驗或者偏見，經常夜晚去club嘅客戶，做生意都不能長久。」通天T話：「你唔去都唔使咒我，罰你今日請飲茶！」