大市隨外圍下跌，但滙控（005）同恒生（011）市後公布中期業績，比市場預期好，期指反彈，低水收窄。如果美股昨晚冇再大插，港股今日早段應有反彈。
滙恒派息慷慨，對股價有支持，但滙恒嘅Call輪冇息收，溢價短期內有可能因而收窄，有心玩滙恒Call輪者，要留意呢個因素。
大市雖有機會反彈，但外圍形勢劣，投資者除咗擔心美國企業管治外，又怕經濟再陷衰退，如果美股唔掂，港股好難單靠滙恒支撐大局，話唔定反彈過後，恒指會再試上月低位9687嘅支持。恒指今日若然重上萬點之上，不妨再做淡友，小注吸納恒指Put輪9205同9287，博恒指再試9687。不過，如果恒指能以大成交升破20日線（目前在10272），Put輪就要先行止蝕。
滙控是日跌1格，收85元，但個別滙豐Put輪不升反跌，例如隻9234就跌咗7.5%，預先反映滙控業績較預期為佳。今日若見滙控升近88元，不妨低吸9234短炒，隻輪10月21日到期，溢價縮至9.5%，槓桿率有27.9倍，爆炸力十足。
章 盛