全球股市趨向一體化，美資大戶影響力遍及全球，究竟係好事定壞事，趙飛雲唔敢講，但肯定一樣嘢就係炒股愈嚟愈難搵食，離場嘅人愈嚟愈多。
美股上周初段係威係勢，趙飛雲亦憧憬過可以帶動港股做好啲，點知上周四港股午市期指突然急插，跟住美股亦展開調整，杜指兩日跌逾4百點。其實近年港股經常預先反映美股跌勢或升勢，到本地投資者採取行動時已失先機，十分被動。
上周五美股大散，外圍形勢亦動盪，以巴仇殺幾乎係例行公事，唔知幾時爆更大鑊；南美洲金融危機有蔓延迹象；美國總統布殊惡形惡相話要打伊拉克，唔通真係逢國內有問題，經濟唔好，領導人就要用打仗轉移視線？外圍局勢亂，確令人擔心。
至於本港因素亦搵唔到有沖喜消息，政府問責制一出就即刻俾仙股風波試出冇料到，最慘係班官員表現令人慘不忍睹，正所謂膊頭冇力，難擔重任，香港市民有乜辦法唔失望。
中國電信傳出上市抽水，本地電訊股會受影響，如果滙豐（005）業績差過市場預期，股價受壓，港股都好難有運行。睇嚟港股向下調整機會大，早前恒指低位9687未必守得住，可以買番啲恒指Put輪9205博一博。
趙飛雲