周五半夜，酒吧內，幾杯落肚，朋友問我寫甚麼專欄，她那個爛玩新婚鬼佬丈夫搶答，一定是性問題信箱。我打蛇隨棍上，心郁郁問，閣下有乜性疑難，不妨搭訕，我盡量回應。
問題一觸即發，頭條問題是，甚麼是righttiming。噢，這個當然要醞釀，需要磨合。但最好時機唔到閣下話事，唔該你，問準頂頭老細，才好大被同眠。假使你連頂頭老闆係邊個都唔知，實揹硬黑鑊，成為仙股罪人。
朋友說，家下唔係講股，講性疑惑喎。係，但問責這回事，除了高官必須形式上配合，紅男綠女都要承擔後果。你知悉局部，不了解細節，咁就可大可小。搞大個肚之後，算不算犯大錯呢？到時想飛身落馬，邊有咁易話為。經手人循DNA驗證，冇花冇假，比較君真，分家產都合理。仙股風暴錯綜複雜，隨時涉及宮廷政變，清官難審家庭事，財政司委任要員調查，擺明是搵替死鬼。頂包這種雜技，你估淨係明星仔識咩！調查嘥氣，不如調情好過。
問及七年之癢，係信箱主人都會叫你忍。五年又連五年，全香港都頂硬上，你有伴，痕就兩份。再問冰火九重天的招式，難度屬於幾多粒星？普通人可否實習？唔，隨着民建聯與自由黨頻密的親身示範，難度比想像低，只要心甘命抵做他媽的縮頭烏龜就易辦事！兩黨未來還會公開表演獨龍鑽異人奇功哩，請信箱讀者密切留意港聞政情。邊睇邊劈sexonthebeach。