香港很多人都不喜歡董伯伯，我本來不算是其中一分子。個人認為董伯伯面目慈祥，講得一口流利英語及普通話，最緊要係頗得到北大人嘅歡心，呢一點對香港嚟講係幾緊要。
直至與一位有學問的長者談起，才改變了看法。「冇人話董伯伯個人唔好，但係我哋𠵱家唔係需要一個好人。」長者說，「我亦好相信，就算搵邊個嚟做，能力亦可能只不過差唔多。」
「咁咪係囉，萬一搵咗個令北大人們篤眼篤鼻嘅人嚟做，咁咪重衰多二錢」我追問。
「問題係唔會搵到個篤眼篤鼻嘅，因為就算搵邊個都好，查實都係欽點嘅，照樣係由冇人識到有人識，煲吓煲吓煲出嚟。」長者細心地向我分析，「𠵱家香港人擺明係想為換而換，換湯唔換藥冇問題，𠵱家係董伯伯個品牌出咗事，大家望住佢個嘜頭就覺心煩氣悶，邊會有心機做嘢。香港人最叻就係揸住一個理由或一個假象就係咁衝，換過個牌頭就可營造出新氣象，咁樣先有希望。」
最近董伯伯想出新招，找來一大班新局長專責俾人問責，聽講班新局長學歷唔錯，條呔又打得幾靚，雖然嘜頭照舊，但總以為會有一番新氣象。點知蜜月期都未過，唔知邊個已經搞單人工股災出嚟，呢位唔知邊個之笨實程度與缺乏社會觸覺，實在係達到難以置信嘅地步？本來以為會有新氣象，結果都係得到個心涼一涼。
不過今次既然有人領高薪專責俾人問責，有責就要負責負責，呢隻「責」應該點都吟唔甩，若然咁都「責」唔到，咁大眾市民就真係越諗越窄，「搵笨」之聲此起彼落。