上市時炒得相當勁，之後又不斷批股集資嘅康健國際（8138），原來唔經唔覺已晉身仙班，上周五雖然升9.76%，收9仙，但經紀陳話，隻股下周二出首季業績，聽聞表現唔多好睇。
其實康健上市之時形象唔錯，話晒做診所應該生意穩定，但經紀陳話，聽來自核數界嘅客仔講，康健業績唔多好睇。隻股主要收入來自診所，唔通經濟唔好，啲人睇少咗醫生？不過上市以來，康健密密收購其他生意，據講除咳藥水業務外，其他都好一般。
查實康健抽水無數，理論上水頭充足，但今次長實（001）要求贖回可換股債券，要錢唔要貨。雖則話康健夠錢畀，但唔知會唔會乘勢又批多一次股，所以散戶真係要小心。
講時講，同康健合作無間嘅難兄難弟宏安（1222），形勢更險峻，經常1仙淨沽冇買盤，睇嚟唔使港交所（388）同證監會立例，隻股都會好快要併股。
慕容小初