記得回歸前，樓股齊飛之時，炒短線股非常興旺，左丁山上到茶樓，都可以聽到如下嘅典型消息。
經紀C話：「嗱，買定一二三四五呢隻股，X先生話會見個半，𠵱家做緊六毫咋，下個星期就會有動作，不妨入番少少玩吓。」個零星期後，「一二三四五」果然升到一蚊，買盤如雲，唔到你唔服。好似呢類嘅炒仙股方法，你話我哋喺茶樓聽得見，金魚缸內亦大把，咁樣，港交所同證監會嘅監察人員聽唔聽得見呢？唔通佢哋坐晒響冷氣辦公室之內，唔出街食飯，對市場傳聞借咗聾耳陳隻耳？
左丁山在八七年受過好大教訓，之後甚少買股票，近年慳番好多！啲消息、莊家、最容易在仙股上下其手，監察機構要對付某些不法之徒，應該個別處理，吼清楚形勢時機先至發難，唔係太難啩？使乜要將所有仙股除牌，去之而後快，禍及眾生？從鄺其志篤爆嘅資料睇，佢哋要將一毫子股除牌，證監會要將一蚊股除牌，最後講價成功，中間落墨，以五毫子為諮詢文件內嘅「除牌價」，我哋直情要多謝鄺其志㖭，如果佢唔力爭，咪重加屍橫遍野！
做公眾事務，要以公眾利益為依歸，不能以自己嘅「英明眼光」為行事準則。群眾冇錯係冇你咁醒咁聰明（所以你坐上高位），但加起來嘅集體智慧，不容侮辱，啲局長、大人物，千祈唔好以為自己係救世主呀。