由李鐵同李瑋峰加盟愛華頓開始，好多人都認為「雙李」屬於商業交易居多，但係經過日前場熱身賽後，當地球迷開始對「雙李」嘅印象有所改變。
利物浦市當地一個網站就做緊網上民意調查，睇下邊個新援對愛華頓影響最大，喺愛華頓日前熱身賽對域斯咸之前，有三成多球迷都選門將李察胡禮，「雙李」喺五個新球員中包辦尾一、二。不過，打完場比賽之後，最新一輪投票結果出現變化，係比賽間接令到球隊博到十二碼嘅李鐵居然由尾二跳升至第二位，僅次於友賽建功球員洛里高，「大頭」李瑋峰則排第三，反映兩人表現頗受球迷受落。
毫無疑問，域斯咸只係英國「丙組仔」球隊，唔可以一場就話「雙李」掂，但起碼有個好嘅開始，有個好印象畀領隊同球迷好重要，我求大俠希望佢哋下場都一樣有表現啦！
AC米蘭防守中場加度素踢法一向有勇無謀就係人都知，但係估唔到呢位意大利國腳連熱身賽都係照衝可也，雙腳飛向波勒，完全唔留情，我求大俠睇完之後重以為呢場係歐冠盃決賽。熱身賽啫，腳下留情好噃？
季前一直吹到成有九百萬鎊身價加盟利物浦嘅保耶，最近就無晒聲氣，列斯最近一於降價到五百萬鎊求售。其實，列斯一早話已經話要放走麻煩多多嘅保耶，希望可以賺番幾百萬鎊幫補下班費，點知搞到降價都可能無人吼。以𠵱家轉會市場交投淡靜，睇怕列斯要再減價都唔出奇。
阿仙奴熱身賽贏慕尼黑1860三比一，保持熱身賽不敗，大演帽子戲法嘅亨利當然出盡風頭，但其實另一位年輕前鋒艾利亞迪里表現都唔錯，新外援G施華亦對辦；最慘係簡奴，下半場入替後冇腳似樣，唔怪得球會減價求售都冇人吼啦！
若要數當今英格蘭球壇最具影響力嘅領隊，曼聯嘅費格遜一定當之無愧。佢老人家同傳媒吹吓風，話可能要賣走一個星級球員補入三個新血，咁「紅魔」買賣球員嘅新聞就即刻排山倒海咁，喺各大英國報紙同電子傳媒度湧出嚟。我求大俠真係要講句：老費，你係得嘅！