中華旅行社總經理張良任嚟咗香港後成日掛住老婆仔女，但原來佢重掛住另一個女人，就係遲遲都嚟唔到香港嘅光華新聞文化中心嘅候任主任平路。佢話平路已經申請咗八個月重未嚟得，幸好重未打破佢嘅紀錄。張良任笑指港台關係未至於冰點咁慘，而且重好樂觀咁話有發展空間㖭。至於光華新聞文化中心主任個位，就一直都係翁桂堂處理，搞到阿翁唔可以返台灣升職。
張良任個仔張永健真係虎父無犬子，八方見佢個樣咁後生，但已經係台灣大學法律碩士研究生。同佢傾幾句，就知佢睇好多書，唔怪得張良任成日喺行家面前讚佢。至於個女就鍾意做生意，似晒阿媽。
張永健同八方講，佢最崇拜《蘋果日報》（香港及台灣）主席董橋同經濟學者張五常。雖然張良任想佢做官，但張永健似乎唔多願意，佢話寧願爬格子，投吓稿，出本歐洲旅遊書，仔大仔世界，老張亦話由得佢咁話。
傳真︰2623-9278
電郵︰