（今日忽然想用廣東話寫稿，可能係產後開心症影響）
老媽子看完報紙後嘆咗三聲，之後就講：「𠵱家香港啲高官得三種，第一種『食嘢唔做嘢』，第二種『做嘢打爛嘢』。」
邊個食嘢唔做嘢？我想大家都可以舉例，不過，即使舉唔到例都唔奇，因為冇做過嘢嘛，冇人提，一時醒唔起。近排邊個做嘢打爛嘢？你話呢？
想當年，老媽子教我時都係咁話我，好彩俾佢話過之後我自強不息，正正經經做嘢。
我問老媽子：「你又話有三種官，講咗兩種，咁重有第三種係咩？」
老媽子話：「前排上頭叫我哋政府千祈咪議而不決，決而不行，之後我留意咗好耐，發現有兩個女官言出必行。一個係『鐵蝴蝶』，可惜佢就快唔做。」
我都覺得鐵蝴蝶唔錯：「咁另一個係邊位呢？」
老媽話：「掃把頭囉。雖然啲人成日笑佢，但係工作方面，佢話唔畀嘅嘢就真係唔會畀你，你死纏爛打，又硬又軟，佢都係唔畀，你憎佢都係咁話。或者你唔同意佢，但佢至少冇講一套做一套，亦唔會扮好人討好人，反而阿伯伯好多時候就婦人之仁，做男人太慈祥似個女人。講到佢班底，有人問責冇人答呢……（下刪數千字）」
各位，千祈唔好睇低師奶嘅分析能力，每個家入面都有卧虎藏龍。