馬灣珀麗灣經過成個月嘅催谷，終於進入大直路，過去兩日，各大代理行動員二千幾人，駐紮葵芳新都會廣場售樓處內外。唔同代理行着唔同顏色T恤，紅黃藍白綠齊晒，迫到寸步難行！
蘭西幾經辛苦，終於迫到去售樓處代理區，眼見幾十張枱坐滿人，個個都簽緊認購表格，加上各大銀行到齊，一時間，只見本票支票滿場飛。
美聯再次運用上市公司財政實力，話預留1.5億元本票，方便買家即時入票，非常大手筆。計計數，每張本票五萬銀，如果用得晒，咪入足三千票？如果真係有咁多票，代表個市有起色，咁就大家都開心啦。
作為最大競爭對手嘅中原，領軍王浩聰同蘭西講，預咗五百至八百張本票迎戰，重會視乎情況增加。蘭西發覺，好多客自備本票，根本唔使佢哋操心。
聲言會用人海戰術嘅利嘉閣，除咗動員超過五百人外，領軍何紹章話，預留咗二百張本票。不過，有需要嘅客唔多，噚日重有個客自備十張本票，話想買多幾個單位喎。
至於鴻運田國強就非常自信咁話，喺地鐵站租用嘅宣傳舖位，效果甚佳，連日成績不俗，唔打算參與本票戰。買家既可用支票代替本票，何必要畀手續費呢？
地產代理行好倚賴一手樓生意，今年新盤唔少係大盤，淨係做一個盤，佣金隨時以千萬計，點可以唔搏命呢。要做得好就要有部署。市建局、長實與新世界合作嘅西環皇后街項目，預料今個月賣樓花，中原響樓盤對面租咗個舖，近三千方呎，主力做收票站及資訊中心，預先吸客。點解話中記有部署，因為呢個舖係短期租約，半年左右，明顯係做完皇后街就散水，唔怕賣完要納空租。
香港興業愉景灣海澄湖畔二段，上個月搞個「1001夜越洋浪漫之旅」選舉，由參加者提出同至愛最浪漫嘅拍拖勝地，結果收到一萬五千幾份表格，反應非常熱烈，今個月中就會公布得獎名單。
香港興業陳子明話，若係填寫山頂或尖沙嘴之類行貨地方，就實「冇行」，佢又透露，有啲填嘅地方都冇乜人聽過，照理好難會成為拍拖勝地啩！
發展商會揀出五百名得獎者，送出三日兩夜免費曼谷Sukhothai或新加坡聖淘沙Beaufort六星級酒店食宿，中大獎嘅一對情侶，就有得入住蜜月套房四日三夜。
究竟個蜜月套房有幾正，睇吓張相就想像到，蘭西有幸見識過，原來個房間面積二千幾呎，裏面重有埋私家泳池𠻹，入住嘅情侶想唔冧都好難嘞。蘭西打聽到呢個蜜月套房一晚原來要五千幾蚊。至於普通房間就係千五蚊一晚。
講番海澄湖畔二段，陳子明話會喺買家中抽十個，免費幫佢哋拍攝溫馨生活片段，等佢哋有個美好回憶。
從事樓按轉介嘅經絡集團，最近搬寫字樓。新址喺中區中環中心58樓05及06室，全海景，四千幾方呎，比上環永安中心舊址大些少，租金就貴三成。裝修連雜費支出過百萬，每呎唔使兩百五蚊，都算平。點解租中環中心，唔知同大業主係長實有冇關係呢？長實係經絡股東。
經絡下個月就成立兩周年，幫趁佢哋，成功與否都有購物禮券送，若果介紹親友做得成樓按，就有百佳超級市場現金禮券，親友每借100萬，推薦人就可獲得500蚊現金禮券，重冇上限㖭。
7月份樓市仍然低迷，新盤唔掂，二手也受壓，連帶銀主盤都冇起色。業內人士對蘭西講，呢排銀主盤一個月賣唔到二百個，但新鮮放售就有三百幾個，咁代表乜，唔講都明啦！
銀行都睇到形勢唔多妥，有啲加佣（由半個佣加到一個），重會畀埋獎金，推動代理搵客，不過好似無效。
業內人士話，銀行賣銀主盤，有好多規矩，唔似得私人業主，為求甩身，話減價就減價。呢排個市又𣲷，物業估價缺乏參考，結果唔夠貼市，叫價偏高，買家自然唔吼。𠵱家賣樓，最重要係個價，所以就算銀行肯畀多啲佣同獎金，都冇減價咁有效。
究竟𠵱家有幾多銀主盤，聽講有成三千一二個，重未計法庭排期等批出嚟嘅單位。
蘭西
電郵地址：