高官問責制推行只有一個月，便鬧出細價股除牌風波，八方趁周末放假，重閱英國政壇小說《YesMinister》，發覺小說好值得風波主角之一的財經事務及庫務局局長馬時亨細讀。這本小說主要講述民選國會議員哈克（JamesHacker）加入英國內閣，出任行政事務部部長，與來自公務員系統的下屬互相鬥法的趣事。
故事講到哈克見到辦公桌上一大堆待覆信件，甚為頭痛，其秘書獻計稱：「你只要把所有信件由Intray放到Outtray就搞掂。」哈克大吃一驚：「咁部長做乜嘢？」秘書好輕鬆咁話：「決定政策；你作出決策後，我哋就遵照執行。」
如果上周馬時亨睇咗呢一段文章，就識點應付班議員啦。
又，馬局長上周三在立法會話，當日早上佢同事先話佢知之前收過啲嘢，原來人家一早已經應局長手下要求將除牌諮詢文件的撮要送交佢辦公室。問題係點解佢下屬冇提過佢，要等立法會下晝開會前，先至同老細講。究竟邊個咁沙膽，咁樣跣佢老細？八方聽過一啲人名，但無確實證據，都係等調查委員會去查吓先。
﹙圖﹚政壇小說《YesMinister》
傳真︰2623-9278
電郵︰