每逢決賽在即，大會都會現場播放兩支參賽隊嘅國歌，噚日播中國國歌時，大會為鼓勵觀眾支持中國女排，特別係大銀幕播上義勇軍進行曲嘅歌詞；雖然現場觀眾唔係個個肯開金口，但記者所見，在場亦有唔少熱血球迷唱番兩句，場面都算感人。
德國噚日喺頭場，以三比一贏咗巴西奪得季軍後，一班球員興奮到好似攞咗世界冠軍咁，除咗17號泰姆攞住支國旗繞場一周外，最搞鬼就係佢哋學晒足球員慶祝入球方式，一時玩狗仔爬行、一時玩飛身插水，佢哋咁投入慶祝，最後當然博得全場觀眾掌聲。
噚日最後一日大獎賽遇正一號風球，但仍然冇阻球迷熱情，全日有超過一萬觀眾到場為中國女排打氣。戰果雖然中國女排輸一比三，不過論表現，呢班新女排仍算有交代，如果唔係，比賽結束後就唔會有幾百觀眾，係場館外歡送中國女排上車返酒店啦。
噚日兩場波之間嘅空檔時間，主辦單位就安排一場電台DJ對歌星嘅排球比賽娛樂觀眾，雖然大會已經搵咗幾位香港女子排球隊代表幫手，不過，由於李彩樺同陳文媛嘅球技實在太差，班港隊代表就算幫到盡set個靚波畀佢哋，最後都係冇一次打過界。