會考就嚟放榜，唔少會考生呢排都患得患失，擔心成績唔好。勞工處破天荒為「展翅計劃」出版一本《憶苦思甜》文集，訪問咗一啲名人，講吓佢哋點樣喺挫折中走出一條康莊大道。第一個出場嘅係政務司司長曾蔭權，喺訪問中，佢講咗唔少小時候嘅辛酸事。
原來當奴（曾之洋名）十九歲就開始搵工，邊個肯請佢就去做，佢話要做兩、三年先清楚自己嘅路向。佢重坦言細個嗰時「樣樣事都要做兩次，會考要考兩次，見工又要見兩次，考政務官都係兩次先至取錄」。
皇天不負有心人！佢終於喺六七年考入政府，但後來又遇到另一個難題——成為少數冇大學學位嘅高級公務員；當奴承認，𠵱條「刺」一度令他耿耿於懷。於是乎佢好驚失敗，凡事比其他人行多幾步，最後喺八一年政府保送佢去美國哈佛大學讀碩士，佢重捧住九個優畢業㖭。一雪前恥之餘，亦都證明自己成功非僥倖。
咁多年嚟，邊個陪住佢行𠵱條咁崎嶇嘅人生路呢？答案係天主。眾所周知，曾司長係虔誠天主教徒，佢每次念玫瑰經時，都會揸住一條喺中一時買嘅、陪咗佢四十幾年嘅黑色念珠，直至五年前，佢先至改用手上嘅戒指取代念珠。
傳真︰2623-9278
電郵︰