財經事務及庫務局局長馬時亨上周出盡「風頭」，事關佢喺立法會公開回應「五角除牌」單嘢時語出驚人，成為政經界熱門話題。其中最精采係佢被議員連番追問佢有無睇過份諮詢文件，馬時亨竟然理直氣壯話，辦公室嘅文件好似成座山咁，無可能每張紙都睇過。此話一出，全場嘩然，咁都未算，佢轉頭又自爆成日同人食飯，咁直又咁笨，有乜理由唔俾班議員玩死？
有議員同八方講，馬時亨唔使咁率直，其實好多議員嘅文件係幾座山咁高，佢哋一樣睇唔晒，但點會蠢到公開向住全港市民咁講。
馬仔今次表現咁差，左派政界人士大歎好難保佢。常任秘書長苗學禮都算係腳頭唔好，幸好佢係公務員，唔需要好似馬仔死得咁慘烈。不過，馬仔雖然千夫所指，但卻博得《信報》林行止激賞，相信連佢自己都意料不及。
傳真︰2623-9278
電郵︰