袁仁祥話可能近排警方掃場掃得嚴，搞到好多入行冇耐、又鍾意一身裏原宿打扮嘅蠱惑仔轉地方搵食。佢哋知道時下口靚仔着咩款波鞋、T恤、手電炒得，於是聘用高買集團代出頭，偷番嚟嘅貨扔上網賣，差人根本好難跟，買家亦好難知道係賊贓。
袁仁祥話今個暑假唔少大形活動就成為高買重災區，上個禮拜時代廣場外個AV騷，竟然成部電視被人抬走（唔知係咪「趴時瑪」？），就算個騷請足實Q，做足防盜，每部機用鋼線綁實，高買專家都可以一一破解。
其次係漫畫節，今年多咗唔少玩具公司參展，聽講好多都唔敢帶啲貴價貨擺賣，因為去到現場根本難以飛出班高買黨手指罅。太源街嫻姐亦有在現場擺檔，問佢怕唔怕被人偷嘢？嫻姐話：「人哋珠寶展幾百萬件首飾就話偷啫，我全場賣十零蚊件玩具，都唔係值錢嘢，班友都唔吼你喇。」唔知算唔算街頭智慧？
P.S.好多讀者電郵問大食Jack上次介紹跳蚤巿場詳情，據知9月份會有舉行第二次，到時定提早介紹給大家，請大家留意。
主持人：大食Jack
八卦熱報：