十位亞視「夏日陽光美少女」日前跟大會攝製隊去咗東莞拍外景，一班靚女燕瘦環肥，雖然佢哋嚟自中外唔同國家，不過一班女仔都相處愉快，未有乜嘢是非傳出嚟。
大會日前安排咗十位「美少女」喺影樓影官方相，佢哋着住三點式泳衣，以二人為一組，重喺鏡頭前擺出唔少誘人嘅甫士，盡顯佢哋嘅天賦本錢。
自稱上圍有31E嘅楊金玲，同30E嘅劉宇軒，二人不約而同喺鏡頭前作俯身狀，但所謂ECup上圍，真係令人難以置信。
另外，根據官方所發出十位靚女嘅年齡同三圍數字，當中以只有十六歲嘅陳碧嘉，佢嘅三圍數字係35E25、37，上圍同下圍都稱霸。而上圍分別係34同34.5嘅外籍美少女Oana同Rachel，着上三點式泳衣，身段均勻，非常養眼。
林嘉欣同盧巧音噚日喺康怡廣場幫星皓新星選拔賽做嘉賓。問林嘉欣對張燊悅之前數臭公司有乜嘢感覺，佢話：「我同佢唔熟，立場唔同，都唔知點講，但我知公司唔開心。我覺得唔好令人難落台，好聚好散。」另外，嘉欣話自己十五歲時，曾因為好想做歌手而一個人去咗台灣一年，重冇同阿爸講。
洪朝豐噚日喺佢前妻位於銅鑼灣嘅洪葉書店度，為新書《昨夜星辰》同《歐遊札記》舉行簽名會。洪朝豐話《歐》書係佢同寶詠琴（寶寶）嘅回憶，問洪朝豐有冇送本書畀寶寶，佢話：「已經送咗，佢重畀咗我好高嘅評語㖭。」洪朝豐重話佢同朋友夾錢開嘅表舖呢個月尾會開張。
許志安（安仔）噚日喺沙田新城市廣場出席「展翅活力高高Go」活動。安仔話最近同公司傾緊想搞番隊band，自己做主音歌手，希望角逐組合新人獎。安仔又話可能會搵女歌星合唱，唔知安仔會唔會搵鄭秀文合唱，擦出新火花呢？
羅文前日經特別通道秘密出院返屋企休養，噚日羅文依然足不出戶。羅文嘅助手阿東就喺下午一點幾搭巴士出去買餸，原本阿東出去買餸時嘅心情都幾好，但係佢買完餸後就直接坐的士返停車場，冇同在場傳媒傾偈，更發惡鬧在場傳媒衝入停車場影相，重話要報警呢！
無綫劇集《皆大歡喜》一班主要演員噚日去將軍澳，正式宣布《皆》劇由原本晚上十點二十分播出，改為喺八點三十分播出，實行同超人氣組合F4喺亞視播映嘅《流星花園》正面交鋒。不過薛家燕講笑話因為新時段係合家歡時間，所以劉丹嘅露點戲都要重拍咁話。