最近平治車廠公布咗Facelifted新版S-Class嘅資料，雖然造型沒有多大改動，但先進PRE-SAFE安全系統及全新S350型號，都係新車賣點所在。
新S-Class外形改動唔係太大，但較前變得闊大嘅車頭氣霸、照射程度更高嘅頭燈、全新設計嘅尾燈等等，都令新車造型變得更富吸引力；而車廂內部亦有作出超過40項嘅改動，如座椅改用更高級嘅真皮鑲嵌等等，以求將S-Class嘅豪邁氣派徹底地展示出來。機械配搭方面，廠方將會為新S-Class增添一台能輸出245匹馬力嘅3.7公升V6引擎，並被定名為S350，而頂級S600則會改用一台5.5公升V12TwinTurbo引擎，從而令新車嘅性能表現更上一層樓。而廠方亦會為新車配用一套PRE-SAFE安全系統，此系統透過車上ESP及BA等電子系統嘅感應器去收集數據，於意外發生前（例如突然急煞或出現側滑情況等等）加以計算，並進行一系列保護措施，如自動將已開啟嘅天窗關掉、自動索緊安全帶及將座椅同靠背，調節至適當距離及角度，以確保安全氣袋能有效保護乘客安全；若意外最終沒有發生，系統更會自行返回StandBy狀態，以便隨時再次啟動。新車將於今年秋季推出，未知香港代理會否同步推出呢？