古語有云：民以食為天，中國人向來喜歡飲飲食食，所以不少人創業時都會首選食肆，就像48歲的黃太，月前就與兒女合資，將香港街頭飲食文化車仔麵搬到夜間娛樂場所較多的常平，以17萬開設車仔麵檔，由家庭主婦搖身一變成為老闆！
記者：劉耀
攝影：陳智
黃太心得
‧店舖要平又夠旺
‧食物乾淨有特色
‧教導員工花心機
‧宣傳工夫要做足
黃太與其他家庭主婦一樣，平時只顧埋首在家頭細務當中，不過因其愛食的性格，竟觸發起她創業的決心。「雖然我只係個家庭主婦，不過自己平時最鍾意就係周圍去食嘢，日子有功就自然識得煮番幾味，咁啱有親戚問有冇興趣開番間舖頭，心諗橫掂自己都咁鍾意食，不如就試一試，當係畀自己一個挑戰。」
鄉下三分親
黃太創業地點選擇在常平市，全因根在常平。「因為常平係我鄉下，所以順理成章就選擇呢度成為創業地點，加上有親戚住喺度，可以搵佢做持牌人，所以就決定喺常平開舖。」
樓高三層盡其用
開舖最重要當然是舖頭位置，「揀舖位就最花時間，搵咗成個月先搵到𠵱家呢個舖位，一共三層，每層約有四百幾呎，地下、一樓做舖面，三樓就用來做員工宿舍，可以慳番租宿舍嘅錢。」
食肆集中人流旺
雖然舖位相當適合，不過更要顧及店舖位置，否則幾平租都無用。「首要條件就係人流要夠多，呢度成條街有成十幾二十間食肆，成條食街咁，自然吸引更多人嚟搵食，而且附近以川菜為主，沒有同類型店舖，就更加容易令人記得我哋。」於是，黃太就選擇以車仔麵為店舖主題。
申請牌照
‧工商營業執照
‧衞生許可證
‧消防證
‧環保證
‧稅務證
東莞政府網址：
訂做特色餸料格
要令食客留有深刻印象，由店舖裝修至食物質素都要有突出的風格，才可以令人食過番尋味。「呢個舖位之前都係做食店，不過就以做川菜為主，所以我就喺門口加建一個車仔麵檔，突出形象之餘亦可以吸引客人。另外，車仔麵必備的餸料格，原來內地是沒有出售的，所以就要自己訂做，之前未知道時亦花了不少時間周圍搵。
「廚房方面，由於之前的排污渠太細，兼且太多垃圾，所以亦要從頭做過，整個裝修亦花了差不多一個月時間。」排除各種困難後，「好麵膳」終於在5月尾正式開張。
引領當地新口味
「好麵膳」位於食街地段，鄰近多間酒店，同區亦沒有同類型對手，生意是否就真的滾滾而來？「開業第一個月生意未算理想，因為內地人對於車仔麵仍然相當陌生，而且他們跟香港人不同，唔係太鍾意主動嘗試新食物，所以他們對車仔麵就有點抗拒，但經過兩個月的努力，內地人對車仔麵已經開始接受。
「其實除車仔麵之外，我們亦有提供小菜，可以讓客人有更多選擇，兼且可以對生意有多點幫助，試過最高生意額的一日約有一千蚊，通常午飯及消夜時間就最旺，因為常平多夜間娛樂場所，所以食肆的營業時間亦較長。」
親自下廚保質素
除了店舖裝修及食物質素是食肆的必備撒手鐧之外，店員的服務質素亦十分重要，現時店舖共聘有一名廚師及五名侍應。「請人多數都係靠貼街招，不過由於內地人與香港人的服務行業意識始終有分別，未必能夠一時間便了解，所以要很有耐性教導他們，讓他們知道甚麼是應有的服務水準。
「廚師方面由於是朋友介紹，所以問題不大，不過現時都係自己負責車仔麵，廚師負責小菜部份，閒時亦會將車仔麵的技術教授給他。」
開業日期：2002年5月
租金 ?6,200(一個月上期；每層約400呎，共3層)
頂手費 ?50,000
裝修 ?40,000
入貨 ?20,000
人工(6名) ?4,000
雜項 ?3,000
流動資金 ?50,000
總投資額 ?173,200
近兩個月平均營業額：?15,000
近兩個月平均盈利：?2,000
開業已經兩個多月，現時生意只可達到收支平衡，不過黃太亦有其一套計劃。「要開分店當然想，但現時只係空談，首要任務反而係要令更多人認識我哋，加強宣傳，提高知名度，叫更多人可以接受車仔麵，令現時的生意得到改善，盼望可以盡快收回成本。」
聯絡我們
面對香港經濟不景，裁員不停，失業率持續上升，香港經濟逐步轉型，人人北望。「北上創業」版訪問一些香港人在內地成功創業的例子，如閣下是其中一分子，又願意將你的經驗跟讀者分享，請聯絡我們。來信請寄將軍澳工業邨西駿盈街八號《蘋果日報》副刊「北上創業」版收或傳真：27420542。請附聯絡電話。