立法會財經事務委員會捉咗四位財經明星馬時亨、李業廣、沈聯濤、鄺其志上去問話，場騷果然好好睇，亦都揭露咗田北俊、曾鈺成嘅執政聯盟全力護航，反對黨（李柱銘、吳靄儀等）意圖拉馬時亨下馬。
除牌機制風波演變成問責制局長風暴，形勢好兇險，特區政府一定要保住梁錦松馬時亨，所以保皇黨在立法會全力攻擊鄺其志，兼拖埋沈聯濤落水；反對黨要攞下馬威，給梁錦松好看；呢場戲你話點玩落去？
幾位賓架老友及大經紀前日急忙打電話通通氣，睇吓有乜對應之策。點解關佢哋事呢？皆因梁馬二人係銀行界出身，個個都識，現身居高位，在公在私，都唔可以得罪；港交所李業廣德高望重，利Sir年老因病入院之後，金融界無咗一個可以「閒話一句」嘅人，李業廣已經算係接班人，點可以唔尊重？沈聯濤鄺其志係「管到正」嘅人物，一日在位，一日唔可以對佢哋無禮。即係話，特區政府與保皇黨要棄車保帥之時，啲賓架要企喺邊個位置？
大家一致同意，絕不表態，千祈唔好得失任何一方，最好呢件事情好快雨過天青，等新人上台（如果有新人嘅話）就再friend過。經紀E嘆話：「本來同KC有交情，但搞到今日咁嘅形勢，我哋唔睇政治唔得，希望佢能諒解。」