我NelNel張學潤有時行街，有啲嘢真係好睇唔過眼，我留意過好多女性，香港明星又或者係闊太，佢哋雖然着得身光頸靚，但就忽略自己嘅儀態，行路好似操兵咁，真係好失禮㗎，其實一個人儀態好影響其他人對你嘅感覺，要由頭到尾統一形象，就要包括儀態，因為「唔曉儀態好閉翳，着得幾靚都冇人睇」！
有好多選美佳麗，行路係唔識伸直隻腳，可能個人又懶，又或着高踭鞋着得攰嘅關係，行路就曲起對腳，成隻蝦米咁，好鬼肉酸，其實要靚就要伸直隻腳嚟行，咁先係由頭靚到落腳，毫無破綻。
另外，坐姿都係好重要㗎，好多女仔着裙都習慣翹腳嚟坐，咁樣就犯咗大忌，因為當隻腳舉起時係最易走光，啲明星俾記者影到走光相都係咁嘅原因。
其實最優雅嘅坐姿係兩個膝頭合埋，雙手放在上面，小腿可以一前一後放，又或雙雙並排略為傾斜，但腳趾一定要用小小力，咁樣成隻腳嘅線條都會靚啲，千祈唔好話辛苦，呢啲嘢習慣成自然，我男人都做得到，點解你哋女人會做唔到呀？
（五之四）
口述：張學潤
筆錄、攝影：馮美茵
示範：湯寶如
化妝：SherylbyBeautySquare
髮型：CalvinChanbyTete
場地提供：BeautySquare