立法會追究仙股事件責任一役，問責新貴馬時亨即刻成為財經界嘅熱門話題。八方問財經界老友，究竟業界對馬局長嘅評價係點？老友話唔想講，不過又話「可以做大企業應付政治危機嘅好教材」咁話喎。
班財經佬睇見今次搞成咁，諗起計仔多多嘅許仕仁。老友話，當年金融風暴搞到正達爆煲，成班小股民要政府賠償；論大鑊程度肯定大過今次。但老許二話不說，搵埋證監、交易所齊齊補鑊，最後大事化小，小事化無，冇人要上身，老董至瞓得着，保住香港國際金融中心呢個招牌！
不過金融服務界喺立法會嘅代表胡經昌，噚日喺電台就大讚鄺其志﹙圖﹚一招回馬槍犀利，佢話正當社會輿論矛頭都指住佢，鄺總裁就戲劇性咁挑穿交易所同證監會之間就除牌建議背後嘅拉鋸，胡少歎曰：「我已經好耐冇讀武俠小說，但今次呢齣確係精采絕倫！」
傳真︰2623-9278
電郵︰