雷諾ClioV6自推出以來，憑着其一台輸出強勁嘅3.0公升V6引擎，而深受一班追求高性能表現嘅車迷歡迎；最近外國方面就有消息傳出，謂廠方有意為ClioV6推出全新版本，當中極具跑味嘅造型，重予人有一份攝人魅力，新車更快者可望於明年初正式登場㖭。
從預想圖中可以睇到，新版ClioV6嘅車首部份，採用與其他Clio型號相近嘅家族式鬼面罩，加埋一對炯炯有神嘅頭燈及霧燈襯托下，可謂別具一份吸引力。車廂布局及配備亦會與現有ClioV6型號相近，以迎合其高性能跑車形象；但一對全新嘅桶形跑車座椅，卻能予人更高嘅承托力，不過確實嘅車廂配搭，仍有待廠方公布有關資料後方可作實。
而引擎則沿用一台3.0公升V6引擎，但經廠方改良後，馬力輸出會較前多出約10匹（達240匹），因而令新車可有更出色嘅性能表現。若然你係高性能跑車嘅Fans的話，就千祈唔好錯過喇。